នគរបាលឃាត់ខ្លួនជនសង្ស័យម្នាក់ ករណីចោរកម្ម និង លួចក្លែងបន្លំប្រើប្រាស់ឯកសណ្ឋាន ជានគរបាលជាតិ
25-December-2018 | ដោយ ពលមនសិការ
ព្រះសីហនុ៖ កម្លាំងជំនាញផែននគរបាលព្រហ្មទណ្ឌ សហការជាមួយកម្លាំងអធិការដ្ឋាននគរបាលក្រុង កម្លាំងប៉ុស្តិ៍នគរបាលសង្កាត់២ កម្លាំងប៉ុស្តិ៍នគរបាលសង្កាត់៤ និងកម្លាំងដែលពាក់ព័ន្ធផ្សេងទៀត បានលោមព័ទ្ធជុំវិញបរិវេណកន្លែងកើតហេតុ រួចរុករកជនសង្ស័យ រហូតចាប់ឃាត់ខ្លួនបានជនសង្ស័យម្នាក់ដែលកំពុងសង្ងំលាក់ខ្លួននៅក្នុងធុងទឹក ជាន់ខាងលើនៃផ្ទះសំណាក់ ចំប៉ីផ្សារលើ។
លោកឧត្តមសេនីយ៍ទោ ជួន ណារិន្ទ ស្នងការខេត្តព្រះសីហនុបានឲ្យដឹងថា កាលពីថ្ងៃទី២៤ ខែធ្នូ ឆ្នាំ២០១៨ វេលាម៉ោង១១និង៣០នាទី ម្ចាស់ផ្ទះសំណាក់ ចំប៉ីផ្សារលើ ស្ថិតនៅភូមិ១ សង្កាត់២ ក្រុង-ខេត្តព្រះសីហនុ បានរាយការណ៍ថាមានជនសង្ស័យម្នាក់ ភេទប្រុស មិនស្គាល់អត្តសញ្ញាណ ពាក់ឯកសណ្ឋាននគរបាល បានធ្វើសកម្មភាពចូលលួចសម្ភារៈមានតម្លៃរបស់ភ្ញៀវគាត់នៅក្នុងបន្ទប់ ពេលគាត់មកទាន់ ជនសង្ស័យបានរត់ផ្លោះចូលទៅក្នុងធនាគារABA។ បន្ទាប់ពីបានទទួលដំណឹងនេះភ្លាម កម្លាំងជំនាញផែននគរបាលព្រហ្មទណ្ឌ បានសហការជាមួយកម្លាំងអធិការដ្ឋាននគរបាលក្រុង កម្លាំងប៉ុស្តិ៍នគរបាលសង្កាត់២ កម្លាំងប៉ុស្តិ៍នគរបាលសង្កាត់៤ និងកម្លាំងដែលពាក់ព័ន្ធផ្សេងទៀតលោមព័ទ្ធជុំវិញបរិវេណកន្លែងកើតហេតុ រួចរុករកជនសង្ស័យ រហូតចាប់ឃាត់ខ្លួនបានជនសង្ស័យដែលកំពុងសង្ងំលាក់ខ្លួននៅក្នុងធុងទឹក ជាន់ខាងលើនៃផ្ទះសំណាក់ ចំប៉ីផ្សារលើ។ លោកស្នងការខេត្តបន្តថា ជនសង្ស័យឈ្មោះ សេង វិឆៃ ភេទប្រុស អាយុ២៧ឆ្នាំ មុខរបរមិនពិតប្រាកដ មានទីលំនៅ មិនពិតប្រាកដ។
វត្ថុតាងចាប់យកបានរួមមាន៖ ម៉ូតូ ០១គ្រឿង ម៉ាក PCX ពណ៌ទឹកមាស គ្មានស្លាកលេខ,វិទ្យុទាក់ទង០១គ្រឿង,ឆ្នាំងសាកវិទ្យុទាក់ទង ០១គ្រឿង,ឯកសណ្ឋាននគរបាល០២ឈុត,អាវរងារពណ៌ខ្មៅ ដៃវែង មានអក្សរ POLICE ចំនួន១,ស្បែកជើងកវែង ០១គូរ,ប័ណ្ណសម្គាល់យានយន្ត០១សន្លឹក,សោររថយន្ត០១,សោរម៉ូតូ០១,ម៉ាឡែត ០១, តួឡឺវីស០២,ដង្កាប់០១,សោរអូរតូ០១,ដបទឹកសម្រាប់ប្រើប្រាស់គ្រឿងញៀន០១,សំបុត្រកំណើត០១។
ករណីនេះ នៅពេលដែលកម្លាំងសមត្ថកិច្ចរបស់យើង កំពុងលោមព័ទ្ធជុំវិញបរិវេណកន្លែងកើតហេតុ ជនសង្ស័យបានរត់ផ្លោះចូលទៅក្នុងធនាគារABA ហើយឡើងទៅជាន់ខាងលើ រួចបើកដំបូលធនាគារABA ផ្លោះមកជាន់លើនៃផ្ទះសំណាក់ ចំប៉ីផ្សារលើវិញ បន្ទាប់មកគេបានចូលទៅសង្ងំលាក់ខ្លួននៅក្នុងធុងទឹក ហើយក៏ត្រូវកម្លាំងសមត្ថកិច្ចរបស់យើងឃាត់ខ្លួនបានតែម្តង។
ចំពោះករណីនេះ ការិយាល័យនគរបាលព្រហ្មទណ្ឌកម្រិតស្រាល កំពុងកសាងសំណុំរឿង បញ្ជូនទៅសាលាដំបូងខេត្ត ដើម្បីចាត់ការតាមផ្លូវច្បាប់ ៕
ចំនួនអ្នកទស្សនា
- ថ្ងៃនេះ9161
- ម្សិលមិញ11441
- សប្តាហ៍នេះ38991
- ខែនេះ154141
- ឆ្នាំនេះ154141
- សរុប20596597